मधेशीलाई लड्न भाजपा नेपाल सेल प्रमुखले सुझाव दिए छन्

मंगलबार थापाथलीमा अजित कुमार

भारतीय सत्तारुढ दल भारतीय जनता पार्टीका नेपाल सम्पर्क सेलका प्रमुख अजित कुमारले विभेदको विरुद्ध लड्न मधेशी युवा नेतालाई लड्न सुझाव दिएका छन् । मधेशीमाथि विभेद भएको कुरा आफूले महसुस गरेको बताउँदै उनले त्यसलाई हटाउनका लागि संघर्षबाहेक अरु कुनै विकल्प नरहेको बताएका छन् ।
अन्तरराष्ट्रिय युवा दिवसको अवसरमा मधेशी पत्रकार संघले आयोजना गरेको नेपाल भारत सम्बन्ध र मधेशी युवाको भूमिका विषयक अन्तरक्रिया कार्यक्रममा उनले मधेशीसँग मात्र होइन, पहाडि समुदायसँग पनि यहाँ विभेद भएको बताउँदै त्योसँग लड्नका लागि हिमाल, पहाड तराई एक हुनु पर्ने धारणा राखेका हुन । भारतमा भारतीय जनता पार्टी पनि विभेदमा परेको र त्यसको लागि ठुलो लडाई लड्दै रहेको उदाहरण दिँदै उनले एक भएर विभेदको विरोध लड्न सुझाव दिए ।

उनले अबको चार महिनापछि भारतीय प्रधानमन्त्री नरेन्द्र मोदी मधेश आउँन लागेको बताउँदै भारत र मधेशको विशेष सम्बन्ध भएकाले त्यसलाई पनि त्यही नजरले हेर्ने बताए । मधेशीमाथि विभेद भएको कुरा भारतमा कसैबाट लुकेको छैन, यहाँसम्म कि मधेशको अवस्थाको बारेमा प्रधानमन्त्री मोदीलाई पनि जानकारी भएको बताउनुभयो ।
भारतीय जनता युवा मोर्चाका उपाध्यक्ष स्वदेश शर्माले नेपाल भारतको बीचमा जुन अवस्थाको सम्बन्ध छ सोही अवस्थाको राजनीतिक सम्बन्ध हुनुपर्ने कुराको जिकिर गरे । नेपालमा मधेशी समुदायसँग भारतको विशेष सम्बन्ध भएकाले सोही अनुसार राजनीतिक सम्बन्ध राख्न उनले सुझाव दिए । मधेश र भारतको जुन सम्बन्ध छ त्यसलाई कसैले चाहेर पनि परिवर्तन गर्न नसकिने बताउँदै उनले भारतको वर्तमान सरकारले मधेशको अवस्थालाई विशेष रुपले हेर्ने प्रतिवद्धता जनाए ।
सोही मोर्चाका महासचिव डा.ध्वनी शर्माले मधेशको अवस्थाको बारेमा आफ्नो सरकारसमक्ष कुरा पुरयाउने विश्वास प्रकट गरे । उनले पनि अधिकारका लागि आफै लड्नुपर्छ, विचार र सिद्धान्तबाट परिपक्क भएर लडेको लडाई जितिने भएकाले अध्यात्मिक शक्ति प्राप्त गरेर लडाईमा उत्रन मधेशी युवाहरुलाई सुझाव दिए ।
राष्ट्रिय मधेश समाजवादी पार्टीका अध्यक्ष शरत्सिह भण्डारीले विभेद विरुद्धको लडाई लड्नका लागि भारतको सहयोग आवश्यक रहेको बताए । उनले जहाँ विभेद हुन्छ, त्यहाँ विद्रोह हुन्छ र विद्रोहलाई दवाउने प्रयास गर्यो भने विखण्डन हुन्छ भन्दै अबको लडाई वारकि पारको हुने चेतावनी पनि दिए । हरेक संघर्ष तथा लडाईमा युवाको भूमिका अपरिहार्य रहेको बताउँदै उनले युवाले साथ नदिएको भए कुनै पनि आन्दोलन सफल नहुने भएकाले युवा देशको संवाहक मात्र होइन, व्यवस्थापक समेत रहेको धारणा राखे ।
संघीय सद्भावना पार्टीका अध्यक्ष अनिल झा र तराई मधेश लोकतान्त्रिक पार्टीका सहमहामन्त्री जितेन्द्र सोनलले भारतले विकासमा सहयोग गर्नुभन्दा सविधान निर्माणमा सहयोग गर्नुपर्ने सुझाव दिए । विकास त हामी आफै गर्छौ तपाईहरुले संघीयतासहितको सविधान निर्माण तथा मधेशमा आत्म निर्णयको अधिकारसहित स्वायत एक मधेश प्रदेश निर्माणमा सहयोग गर्न भारतीय नेताहरुलाई आग्रह गरे । 
मधेशी जनअधिकार फोरम गणतान्त्रिकका अध्यक्ष राजकिशोर यादवले दिल्लीले मधेशलाई काठमाडौको नजरबाट होइन, मधेशलाई मधेशकै नजरबाट हेर्न आग्रह गरे । नेपाल र भारतको सम्बन्धलाई स्थापित गर्नका लागि मधेशको विकास आवश्यक रहेको कुरामा जोड दिँदै उनले प्रधानमन्त्री मोदीको भ्रमणले नेपाल र भारतको सम्बन्धलाई स्थापित गरेपनि त्यो मधेशविना अधुरो रहने बताए । कार्यक्रममा सद्भावना पार्टीका महासचिव मनिष सुमन, तमलोपाका सुरेश मण्डल, युवा नेता विक्की यादव, राष्ट्रिय मधेश समाजवादी पार्टीका केशव झा, सद्भावना पार्टीका योगेन्द्रराय यादवलगायतले आ–आफ्नो धारणा राखेका थिए ।