ढोकैमा दाहालका मुख्य सहयोगी चूडामणि खड्कालाई भेटेर 'बाबुराम सरले एउटा पत्र पठाउनुभएको छ, अध्यक्षज्यूलाई दिनुहोला' भनी फर्किए।
स्टिच खोलेर पत्र पढेपछि दाहाल छाँगाबाट खसेझैँ भए। भट्टराईले पत्रमा 'पार्टी परित्याग गरेको' व्यहोरा उल्लेख गरेका थिए।
भट्टराईको अप्रत्याशित राजीनामा आएपछि एकछिन त दाहालले केही सोच्नै सकेनन्। आफू, पार्टी र देशसमेत एकैचोटि भयंकर संकटमा परेका बेला बाबुरामले नमज्जासँग धोका दिएको महसुस गरे। जबकि यतिबेला उनले भट्टराईको सबैभन्दा बढी सहयोग अपेक्षा गरेका थिए। पत्रबारे दाहालले न भट्टराईलाई फोन गरेर बुझ्न सके, न त सहयोगीसँग सल्लाह नै गर्न भ्याए।
केहीबेरमै भट्टराईले पत्रकार सम्मेलन गरेर पार्टी परित्यागको घोषणा गरिदिए। देश–विदेशमा समाचार फैलिएपछि लगातार दाहाललाई फोन आउन थाल्यो। तर, अचानक के भइरहेको छ भन्ने उनले नै ठम्याउन सकेनन्।
आइतबारदेखि केन्द्रीय समिति बैठक बोलाउने भट्टराईकै प्रस्ताव थियो, त्यसको अघिल्लो दिन अचानक राजीनामा घोषणा गरिदिए।
दुई दिनअघि दाहाल, भट्टराई र उपाध्यक्ष नारायणकाजी श्रेष्ठ उपस्थित बैठकले दुईवटा निर्णय गर्योि। पहिलो, असोज १० गतेका लागि केन्द्रीय समिति बैठक बोलाउने र अर्को संविधान निर्माणपछि प्रेस विज्ञप्ति जारी गर्ने। त्यो दुवै काम त्यही दिन सम्पन्न भयो।
संविधान निर्माणपछिको अवस्थामा पार्टीलाई कसरी अगाडि बढाउने भन्नेबारेमा लाजिम्पाटस्थित दाहालको छतमा दुई घन्टा दुवै नेताबीच गम्भीर छलफलसमेत भएको थियो। छलफलमा पार्टीलाई नयाँ ढंगले लैजान माओवादी शक्तिलाई एकै ठाउँमा ल्याउने र नयाँ कार्यदिशा विकास गरेर अघि बढ्नेसम्मका कुराकानी भएको थियो।
'वैद्य, विप्लव, मातृका र मणि थापा सबैलाई एकैठाउँमा ल्याउने र नयाँ शक्ति बनाएर अघि जाने भन्नेसम्मको कुराकानी भएको थियो तर आज अचानक राजीनामा आयो, छक्कै परियो,' दाहालनिकट स्रोतले भन्यो।
'पत्रकार सम्मेलन गरी पार्टी परित्यागको घटनाले हाम्रो पार्टी आश्चर्यमा परेको छ,' प्रवक्ता दीनानाथ शर्माले मध्यराति विज्ञप्ति जारी गर्दै भनेका छन् ।
भट्टराईले पहिलो संविधानसभा विघटन भएयता तीनपटक अध्यक्ष दाहाललाई राजीनामा दिइसकेका थिए तर कुनै स्वीकृत भएको थिएन। तर, शनिबार पहिलेभन्दा फरक भयो, उनले राजीनामा बुझाएर पत्रकार सम्मेलनबाट घोषणा गरिदिए।
खासमा भट्टराई संविधान निर्माणक्रममा ६ वटा प्रदेश बनाउने प्रमुख दलबीच सहमति हुदाँसम्म अध्यक्ष दाहालको साथमा कटिबद्ध थिए। उक्त सहमतिलगत्तै भट्टराईमा परिवर्तन देखा पर्न थाल्यो। उनले अध्यक्ष दाहाललाई असहयोग मात्रै गरेनन्, संविधान निर्माणलाई तिव्रता दिन लागिपरेका दाहाललाई रोक्न भरमग्दुर प्रयास पनि गरे। संविधान निर्माण प्रक्रिया नरोके राजीनामा दिनेसम्मका धम्की अध्यक्ष दाहाललाई दिन थाले तर दाहालले उन कुरा सुन्दै सुनेनन्।
भारतीय राजदूत रन्जित रेको क्रियाशीलता बढेपछि उनी झन् उग्ररुपमा प्रक्रिया रोक्न लागि परे भने भारतीय प्रधानमन्त्री नरेन्द्र मोदीका 'दूत' एस. जयशंकर आएपछि उनी पूरै संविधान निर्माणको प्रक्रियाको विपक्षमा उभिए। भट्टराईमा आएको यो परिवर्तनलाई बुझ्न दाहाललाई कुनै गाह्रो थिएन तैपनि संविधान निर्माण प्रक्रिया भने रोकेनन्।
संविधानसभाबाट संविधान पारित भएको दिन सबै सभासद र नेताले हाइहाइ गरे, दाहालसँग तस्बिर खिच्न तछाँडमछाडसमेत भयो तर सोही पार्टीका नेता भट्टराईलाई भने पूरै बेवास्ता गरिएको दृश्य निकै नरमाइलो थियो। अन्ततः भारतको दबाब, तराई–मधेसकेन्द्रित दलको असहयोग र बहिष्कारका बीच सारा संकटलाई पार लगाउँदै असोज ३ गते ९१ प्रतिशत सभासदको समर्थनमा संविधानसभाबाट नेपालको संविधान जारी भएरै छाड्यो।
भट्टराईले भने त्यसको खुसीयाली नमनाउने घोषणा मात्रै गरेनन्, सरकारले आयोजना गरेको स्वागत कार्यक्रममा पनि उपस्थिति जनाएनन्। अचानक शनिबार उनले आफ्ना सहयोगी क्षेत्रीलाई राजीनामा पत्र पठाएर पार्टी परित्यागको घोषणा गरेका छन्।
अध्यक्ष दाहालले बिहान ८ बजे स्थायी समिति बैठक बोलाएका छन् भने दाहाल–भट्टराईबीचको सहमतिअनुसार बोलाइएको केन्द्रीय समिति बैठक आज (आइतबार) बाट पार्टी मुख्यालयमा सुरु हुँदैछ।
'आश्चर्यजनक रूपमा आएको राजीनामाले म स्तब्ध छु, उहाँले राजीनामा फिर्ता गर्नुहुनेछ भन्ने आशा गर्दछु,' उपाध्यक्ष नारायणकाजी श्रेष्ठले भने।
No comments:
Post a Comment