रेखा थापाजीले के सम्म गर्नु भएन, तर सिफारिस मै पर्नु भएन

नायिका रेखा थापा,एकीकृत माओवादीका अध्यक्ष पुष्पकमल दाहालसँग ५ दिने 'असफल' आम हडतालको क्रममा भद्रकालीमा कम्मर मर्काउँदै ‘कि लाऊँ मै तिर, कि लाऊ उही तिर....’ भन्ने बोलको गीतमा नाचिन । लगत्तै, एमाओवादी दर्ज हुन पुगेकी चर्चित नायिका थापा पछि एमाले परित्याग गरी आएकी उर्मिला अर्यालसँगै एमाओवादीमा औपचारिक रुपमा प्रवेश गरिन् । रेखालाई केन्द्रीय सदस्य बनाउन लागेको कुरा चर्चामा पनि आयो तर उनी केन्द्रीय सदस्य त के राज्य समिति सदस्य सम्म पनि हुन सकिनन् । लगत्तै, मोरङवाट प्रत्यक्षमा उम्मेदवारी दिने कुरा आयो, त्यहाँवाट पनि उनको नाम सिफारिस भएन । फेरी माओवादीले जित्नै नसकेको पर्सावाट उम्मेदवारी सिफारिस भएको हल्ला आयो तर भोजपुरा इन्चार्ज प्रभु साहले उनको नामै सिफारिस नगरिएको मिडियालाई बताए । पर्सावाट सिफारिस भएका हल्लाले प्रभुलाई कति टेन्सन दियो त उनलाई फोन गर्दा थाहा नै हुन्छ । उनलाई यति धेरै टेन्सन भयो कि आजकाल उनी रेखाको नाम पनि सुन्न चाहान्नन् । भुगोलवाटै सिफारिस हुन नसकेकी रेखा सिफारिस हुने एउटा मात्रै ठाउँ वाँकी थियो, माओवादी निकट अखिल नेपाल चलचित्रकर्मी संघ। तर, त्यो संघले अरु १४ जनाको नाम सिफारिस गरेर पेरिस डाँडा पठायो तर रेखाको नाम भने (छुटाएछ) सिफारिस नै गरि दिएनछ । भन्नेहरु के भन्छन भने, त्यसैले रेखा आजकाल निकै तनावमा छिन् ।

राजधानी दैनिकमा कार्यरता डब्बु क्षेत्रीले माओवादी निकट कलाकर्मी संघले १४ जना कलाकारको सिफारिस गरेको भन्दै समाचार लेखेका छन तर त्यहाँ रेखाको भने अत्तोपत्तो छैन । उनका अनुसार सबै कलाकार समानुपातिकमा सिफारिस भएका छन, प्रत्यक्षमा कोही पनि छैनन् । क्षेत्रीले लेखेको समाचारमा को–को उम्मेदवारका लागि सिफारिस भए त ? तल पढनु होस्,
एकीकृत नेकपा माओवादीअन्तर्गत अखिल नेपाल जनसांस्कृतिक महासंघअन्तर्गत राज्य कमिटीले दोस्रो संविधानसभाको निर्वाचनमा समानुपातिक प्रनितिधित्वका लागि चलचित्र, संगीत र नाट्य क्षेत्रबाट १४ जना कलाकारको नाम पार्टी केन्द्रीय कार्यालयमा पठाएको छ । चलचित्र, संगीत नाट्य क्षेत्रबाट सिफारिस माग केन्द्रबाट भएअनुसार सिफारिसका लागि नाम पठाइएको महासंघले जनाएको छ ।

पार्टीसँगै चलचित्र, संगीत तथा नाटय क्षेत्रमा लामो समय देखि सक्रिय रहेका कारण यी स्रस्टाहरुको नाम सिफारिस गरिएको महासंघले जनाएको छ । जसमा अभिनेत्रीका तर्फबाट काठमाडौंबाट मौसमी मल्लको नाम सिफारिस गरिएको छ । तीन दशक देखि चलचित्रमा क्रियासिल मल्ल अखिल नेपाल चलचित्रकर्मी संघसँग आबद्ध छिन् । चलचित्र विकाश बोर्डको पूर्व अध्यक्ष गणेश भण्डारीको नाम सुर्खेतबाट सिफारिस गरिएको जनाएको छ । उनी चलचित्रकर्मीका इन्चार्ज पनि हुन् । कलाकार एवँ द्धन्द्ध निर्देशक राजेन्द्र खड्गीको नाम पनि काठमाडौंबाटै सिफारिस गरिएको छ ।

उनी निर्माता एवँ निर्देशक पनि हुन् । यस्तै चलचित्र निर्देशनबाट खड्गी बाहेक अरु ६ जनाको नाम सिफारिस गरिएको छ । ती मध्य नेपाल चलचित्र निर्देशक समाजका पूर्व अध्यक्ष केपी पाठकको नाम काठमाडौंबाट सिफारिस गरिएको छ । अखिल नेपाल चलचित्रकर्मी संघका अध्यक्ष एवँ चलचित्र निर्देशक शिबजी लामिछानेको नाम काँस्कीबाट सिफारिस गरिएको छ । उनी चलचित्र निर्माता हुन् । लिम्वान चलचित्रकर्मी मञ्चका अध्यक्ष एवँ नेपाल चलचित्र निर्माता संघका उपाध्यक्ष उदय सुब्बाको नाम महासंघले झापाबाट सिफारिस गरेको छ । उनी चलचित्र निर्देशक हुन् । अलिख नेपाल चलचित्रकर्मी संघसँग आबद्ध अर्का निर्देशक दीपक श्रेष्ठको नाम समानुपातिक उम्मेदबारका लागि सुनसरीबाट सिफारिस गरिएको हो । उनी चलचित्र निर्माता पनि हुन् । अखिल नेपाल चलचित्रकर्मी संघका उपाध्यक्ष बिजय बस्नेतलाई महासंघले महोत्तरीबाट सिफारिस गरेको छ ।

उनी पनि चलचित्र निर्देशक हुन् । नेपाल चलचित्र निर्देशक समाजका उपाध्यक्ष राजु केसीको नाम मकवानपुरबाट सिफारिस गरिएको महासंघले जनाएको छ । केसी छायाँकारका रुपमा पनि परिचित छन् । यस्तै चलचित्र संगीतबाट दुई जना सँगीतबारको नाम महासंघले सिफारिस गरेको छ । जसमा सँगीतकार चेतन सापकोटा र अर्का सँगीतकार लक्ष्मण शेष रहेका छन् । अखिल नेपाल जनसाँस्कृतिक महासंघका अनुसार यी दुबै सँगीतकारको नाम मकवानपुरबाट सिफारिस गरिएको हो । नाट्यकर्मी, कवि एवँ सँगीतकर्मी धिरेन्द्र पे्रमर्षीलाई सिराहाबाट सिफारिस गरिएको छ ।

अर्का नाट्यकर्मी रमेशरञ्जन झालाई धनुषाबाट महासंघले धनुषाबाट सिफारिस गरेको छ । लोक गायक एवँ सँगीतकर्मी नारदमुनी हार्तुमछालीलाई भोजपुरबाट सिफारिस गरिएको पनि अलिख नेपाल जनसाँस्कृतिक महासंघले जनाएको छ । एमाओबादी पार्टी केन्द्रिय समितिको बैठकले यी १४ जना मध्य उपयुक्त लागेकाहरुलाई समानुपातिक बन्द सुचीमा पठाउनको लागि सिफारिस गर्ने सो पार्टीले जनाएको छ । आगामी ४ मँसिरमा हुने भनिएको निर्वाचनमा अन्य पार्टीले चलचित्र, सँगीत, नाट्य क्षेत्रबाट कलाकारहरुलाई उम्मेदरबार बनाउने तयारी सहित सिफारिस मागेका बेला एमाओबादीको कलाकारहरुको नाम पनि महासंघले सिफारिस गरेर केन्द्रिय कार्यालयलाई पठाएको हो ।