जेलवाट जेपी गुप्ता भन्छन– प्रजातन्त्रको आधार समाप्त

प्रधानन्यायाधीश खिलराज रेग्मीलाई चूनावी मन्त्रिपरिषद्को अध्यक्ष बनाएर प्रमुख चारदलले प्रजातन्त्रको न्यूनतम आधार समाप्त पारेको आरोप पूर्वमन्त्री जेपी गुप्ताले लगाएका छन् । गुप्ताले नेपालका राजनीतिक दलहरु असक्षम भएको प्रमाण विश्व सामु दिएको बताउँदै निकासका लागि गरिएको यस प्रयासलाई सकारात्मक रुपमा पनि लिएका छन् ।

 जेल जीवन विताई रहेका पूर्वमन्त्री गुप्ता डिल्लीबजारस्थित जेलमा मधेश डटकमका सम्पादक बी.पी.साहसँग विशेष कुराकानी गर्दै राजनीतिक दलहरुले मुलुकको निकासका लागि गरेको यो निर्णयले प्रजातन्त्रको आधारभुत सिद्धान्त समाप्त पारेको बताएका हुन् । गुप्ताले भने–“प्रमुख राजनीतिक दलहरुले प्रजातन्त्रको आधारभुत सिद्धान्तलाई समाप्त पारी चालेको यो कदमलाई म विरोध पनि गर्दिन, न त समर्थन नै गर्छु । मुलुकको निकासका लागि गराईएको यो दुर्घटनाले सकारात्मक परिनाम देओस् भन्ने आशा गरेको छु ।”


 यसरी संविधान बन्न सक्दैन

दलहरुले संविधानका आधारभुत विषयमा सहमति नगरी सरकार परिवर्तन गर्दा अझै पनि संविधान बन्ने वातावरण नबनेको गुप्ताले बताएका छन् । सहमति विना संविधान बन्नेप्रति शंका व्यक्त गर्दै गुप्ताले दलहरुले संविधानका विषयमा पनि सहमति गरेर सरकार परिवर्तन गरेको भएको संविधान बनाउन सहज हुने बताएका छन् । गुप्ताले भने–“दलहरुले संविधानका आधारभुत विषयमा सहमति गरेको छैन, यस्तै अवस्थामा संविधान बन्न कठिन छ ।”
 
मधेशी मोर्चा पनि चुके

 पूर्वमन्त्री गुप्ताले संयुक्त लोकतान्त्रिक मधेशी मोर्चा र तीनदलले गरेको राजनीतिक सहमतिमा मधेशी मोर्चा चुकेको बताएका छन् । गुप्ताले नागरिकता र मतदाता नामावलीका विषयमा गरेको सहमति आधार विना भएको बताएका छन् । उनले भने–“नागरिकता र मतदाता नामावलीका विषयमा गरिएको सहमति विश्वसनिय छैन, भोली केही अडचन आउन सक्छ, मधेशी मोर्चा र मधेशी जनता सचेत बस्नुपर्छ ।”
गुप्ताले आगामी संविधानसभाको निर्वाचनले मधेशलाई अधिकार सम्पन्न बनाउन नसक्ने ठोकुवासमेत गरेका छन् । गुप्ताले भने–“अहिले मधेशवादी दलहरु निर्वाचनमा जानका लागि आतुर देखिएका छन् तर आगामी निर्वाचन अथवा संविधानसभाले मधेशका मुद्दालाई समाधान गर्न सक्दैन ।” 
source: jpgupta.com